أصول التباتة ... في فنون الشحاتة

[ندعوك للتسجيل في المنتدى أو التعريف بنفسك لمعاينة هذا الرابط]

المصري عمل كل حاجة .... وصل لنهاية التاريخ .... بنى الهرم .... حفر قناة السويس .... قتل ولادة .... دفع في فرح 50 مليون .... زرع .... (قلع) .... حصد .... أكل حمير .... سرق .... نصب .... جاهد .... صلى ... صام ... حج واعتمر .... حارب وانتصر.... وقف طوابير أطول من نهر المسيسيبي .... عمل بطاقة تموين حمراء وخضراء ... استحل الميتة والدم ولحم الخنزير ... فنان .... حقير .... وغد .... قذر .... عمل كل حاجة .... واحد صديقي مغترب دائماً قال لي في مثل جزائري بيقول "يا رايح مصر ... في منك ألف " قلتله يعني إيه ؟؟.... قاللي يعني اللي هايروح مصر لا يمكن يكون متميز في أي حاجه .... احنا عملنا كل حاجه .... عملنا كل حاجة في عصرنا الحالي من أجل الحصول على المال .... ولو بالشحاته ..... والشحاتة لها طرق وأساليب .... وفن .... أيييوه لا تتعجب الشحاتة فن ..... كيف تستخرج من جيب الآخرين الأموال بالرغم من أنهم يعرفون أنك (غالباً) نصاب ..... هانستعرض فنون الشحاتة من خلال مواقف بسيطة حصلتلي وبتحصلنا كلنا يومياً .

آخرها كان النهاردة في صلاة العشاء وقبل السلام (مباشرة) سقط مغشياً عليه .... طبعاً كل الناس (هرعت إليه) لانقاذ الموقف فقد يكون مريضاً .... أو حالة غيبوبة سكر أو ضغط عالي ..... أنا قريت الحالة أول ما حصلت مباشرة علشان توقيت الإغماء شككني لأعلى درجة ... لكن قلت أراقب الموقف من بعيد يمكن يكون أنا ظالم الراجل وسيء الظن .... صليت السنة وفوجئت إن في ناس بتفوقه وواحد جايبله عصير جهينة بطعم الفراولة .... اتغظت جداً ... وقلت في عقل بالي ...يا واد اترمي في الأرض انت كمان وأديهم عارفينك برضه مش هاتهون عليهم ... وهايشوفوك بعلبة عصير .... مكدبتش خبر .... وقعت في الأرض (وعملت صوت ارتطام كمان) ... وانتظرت شوية .... محدش خد باله للأسف الشديد ... حاولت مرة تانية (بصوت ارتطام أعلى) .... ولقليت ولد صغير جاي نحيتي ... غمضت عيني وقلت بصوت خافت ... "جوافة" (علشان ميجيبوليش فراوله ..أنا عاوز جوافة) .... لقيت (الكلب) الصغير ده راح مدهوس في بطني وأنا ملقى على الأرض علشان كان رايح يملى ميه للراجل المغمى عليه .... المهم ملقتش أمل في الموضوع ده قمت ونفضت هدومي .... وصليت الوتر ودعيت ربنا (اللي أكرم من الكل ) انه يرزقنا بحاجه حلوة كده ..... (مش عاوزين تهريج بقى ...خلونا نتكلم جد شويه)

طبعاً صدق حدثي .... بيقولوله أنت منين ...قال أنا من الفيوم ... جاي لمين هنا .... أنا بدور على شغل بقالي 4 أيام ومش لاقي ..... المهم أنا سيبتهم وطلعت ومعرفش الليلة دي خلصت على إيه بس (عادة) الناس الطيبين بيدوله حاجة ويمشوه وخلاص .

****

موقف تاني يدل على إن الشحات المصري (خلاّق) ... كلنا شفناه قبل كده ..... شخص قاعد بيبكي في الأرض وجنبه 3-4 بيضات مكسورين .... أو أحياناً .... سائل أبيض مراق على الأرض يدي الناظر انطباع ان ده لبن .... طبعاً الماره في الطريق بيصعب عليهم الوضع ده وكل واحد يديله حاجه .... اللي لاحظته في الحالات دي إن في شخص أو اتنين (مشتركين في المسرحية) .. بيلفتوا أنظار الناس للحدث .... يقولوا (لاحول ولا قوة إلا بالله ) بصوت مسرحي مبالغ فيه ... وممكن حد فيهم يطلع حاجه يديها للشخص (الباكي على اللبن المسكوب) علشان يفتح المزاد.... الغريب جداً تفاعل البعض مع المسرحية دي ..... وكنت أفضل كثير انهم يعملوا العرض ده بصفتهم ممثلين وياخدوا حاجه على التمثيل (زي بره) أحسن من الوضع المقزز ده

****

موقف ثالث وكلنا بنشوفه دائماً في الطريق وهو قصة المسافر (زاده الخيال) اللي عاوز يقطع تذكرة القطر (مش عارف ليه كلهم مصرين على القطر) ... وبيقولك عاوز حق تذكرة المترو (لحد رمسيس) وبعدين حق تذكرة القطر لحد (والاشيا العظمى بلد الكونت دراكيولا) ... ومينفعش واحد والتانية لاء علشان الثواب يبقى كامل ..... واحد منهم قابلني وكنت رايح رمسيس بالصدفة ...قلتله تعالى معايا أقطع لك التذكرة .... قاللي ماشي يالا .... وبعدين لما لاقاني بتكلم بجد ورايح فعلاً .... قاللي انت هاتعطلني معاك ليييه؟؟؟؟ قلتله آسف جداً اني هاقطع عليك (الوردية) اتفضل روح كمل شغل

****

الموقف الأخير (علشان متزهقوش ) الشحاتة المباشرة ... بمعنى (حسنة قليلة تمنع بلاوي كتيرة .... لله يا محسنين ) .... ودي مفيهاش لف ولا دوران .... شحات قاعد في حاله وانت اللي بتروحله زي الباشا ..... ودي أنجح الطرق حتى الآن ... نظراً لتعرضه لشريحة كبيرة جداً من الناس منهم أصناف كتير جداً فأكيد بعضهم بيحن :)

****

ما يستفاد من هذا البوست

1- الشحات له نص الدنيا

2- شحات شحت من شحات طلعت في (إيده) حسنه :))))

3- شحات وعاوز عيش فينو

4- علمناهم الشحاته سبقونا على الأبواب

5- قبل ما تترمي في الأرض يكون في ايدك ورقة مكتوب فيها نوع العصير اللي بتشربه (الراجل مكانش حابب الفراولة ... أيوه أخدت بالي )

6- الشحاته فن مش تقطيع هدوم

7- من فضلك (تحرى) للصدقة فأولى بها (مليون مرة) محتاج حقيقي مش هايطلب منك أبداً .... دور عليه وأنت المستفيد مش هو .

8- لا تساعد شحط لو علقوه في مقطورة هايشدها على مكسب بلا مجهود علشان يصبح عالة عليك دائماً

9- الشحات ده ممكن يكون مدمن أو مجرم لكن بيشتغل شحات (بارت تايم) بيزود دخله يعني ... لو سمحت متساعدهوش

10 - لو خلاص الحسنة زنقتك أوي ومقدرتش تقاوم نفسك إدعى ربنا أن يصلحه بها لو لم يكن يستحقها ... وأن يغنيه بها إن كان يستحقها .

ــــــــــــــــــــــــــــــــــــــــــــــــــــــــــــــــــــــــــــــ

ملحوظة : البوست ده أنا مكنتش ناويه خالص أنا كنت بكتب موضوع تاني بس بعد الصلاة حسيت إن الموقف ده (مأثر في جداً علشان الجوافة) لازم أنقلهلكم ونتبادل الآراء حوله .... إيه رأيك في الشحاته ؟؟؟؟؟؟؟؟؟؟ أصل في ناس كتييير بتقول اديله وملكش دعوة وبيستدلوا بكلام في غير محله . قول رأيك لو سمحت :)

منقول2

موضوع معدى يا اسماعيل

و كل الكلام اللى فيه مظبوط و الله

بس هوه اللى حاطط جنبه بيض ده

هوه نفسه بتاع ميلودى ولا واحد تانى بيضحك 3

الموضوع ده فعلا زاد عن حده والواحد مش عارف يعمل ايه
انا عندى اللى بيبيع اى حاجه (مناديل لمون........)اى حاجه يعنى احسن بكتير من اللى واقف بيشحت وخلاص على الاقل اللى بيبيع ده اهو شغال وخلاص بيحلل الفلوس اللى بتجيله
لكن بجد انت بتلاقى واحد او واحده بسم الله ما شاء الله عندهم صحه يمكن احسن منك وبيشحتو
ربنا يصلح حالهم جميعا

انا عن نفسى مش بفكر انه يستحقها ولا لا
المهم عندى طاعه ربنا ورضاه
وانا لما بدى حد حاجه بتكون لوجه الله ومش بفكر هتروح لمين
يعنى مش هفكر دا يستحقها ولا لا
اذا كان يستحقها خلاص واذا كان لا بتبقى حمل عليه فى وقت الحساب

طبعا الموضوع جميل يااسماعيل واسلوب عرضه روعة وعموما طبعا المؤمن كيس فطن
يعنى طبيعى انك كمسلم ترفض النصب والاحتيال وفى نفس الوقت المسلم كريم
دائما فى حاجة أخيه المسلم وأهم من دا كله إخلاص النية لوجه الله تعالى
يعنى الأمر محتاج موازنة ومدتيش النصابين ومش معنى كدة انك متديش انت تدى
بس للى يستحق
وشكرا مرة تانية على الموضوع الجميل

catsh me if u can كتب:: انا عن نفسى مش بفكر انه يستحقها ولا لا
المهم عندى طاعه ربنا ورضاه
وانا لما بدى حد حاجه بتكون لوجه الله ومش بفكر هتروح لمين
يعنى مش هفكر دا يستحقها ولا لا
اذا كان يستحقها خلاص واذا كان لا بتبقى حمل عليه فى وقت الحساب

طب ممكن نتخيل لو كل الناس عملت كده
هتلاقي ان الحكاية بقت مربحة وهنشجع ناس تانية تعمل زيهم
واعتقد ان اللي محتاج فعلا .. بيستحي يطلب من الناس
وده المفروض دور اللي ربنا مقدره وعايز يساعد حد تاني
انه يدور علي اللي محتاج فعلا ويديله .. من غير ما نبقي بنشجع الشحاتة والنصب اللي بيحصل فيها
ياريت ما نفكرش اذا كان محتاجها ولا لأ .. ونفكر ان الفلوس دي لو راحت لمكان تاني
واثقين انه هيديها للي محتاجها فعلا .. كده نبقي عملنا اللي علينا فعلا
وما يبقاش فيه مجال للشك ساعتها .. يعني مش هنبقي شاكين اذا كان محتاجها فعلا ولا لأ
واعتقد ان ده دور الجمعيات .. وهي ولله الحمد كتيرة
بس احنا اللي مقصرين باننا نروح الأماكن الخيرية دي
وبنخجل "خجل مش في محله" لما شحات بيطلب مننا
لكن لو تخيلنا ان كل الناس ما اتدلوش حاجة .. هيبطل الشغلانة دي
لأن فيه كتيير بيعتبروا الشحاتة مهنة ... واذا كان محتاج فعلا .. يروح لجمعية
لكن لأنه عارف ان الجمعيات الخيرية بتدرس حالة اللي بيتقدم فيها اذا كان محتاج أو لا
مش بيسجل في اي جمعية لأنه عارف انه مش يستحق

موضوع رائع وطريقة العرض خفيفه وبتوصل المعلومه
أما بالنسبه للشحاتين فى بجد حالات تغيظ وتخلى الواحد يقطعهم وخاصة اللى بنقول على نفسها مش شحاته دى بتشحت عشان محمد أبنها(أسم النبى حارسه وصاينه)
والصراحه أصبحن فن صح واللى يشوف المنظر عند أبواب اولياء الله الصالحين يتأكد

شكرا علي الردود الأكثر من رائعه ,,, وأتمني تكون وجهة النظر وصلت ,,, وربنا يصلح الحال

» فنون غريبة !!!!!!!!!!!
» العبر والدروس في أصول البحث عن العريس والعروس
» فنون تقديم التمر ,,, وكل سنه وانتم طيبين !!!
» اسرة فنون......you`ll never be alone
» معرض فنون