إمتحانات المستقبل البهيم !!

السلام عليكم ورحمة الله وبركاته

إمتحانات المستقبل البهيم !!

فى البداية خد نفس عميق وإتنهد تنهيدة كبيييرة !!

دى مقادير المقال حاول متغيرهاش !

كل مرة تبدأ السنة وتنتهى ونقول خلاص تقريبا اللى جاى أفضل وبكرة أحلى والمستقبل ملىء بالخيرات

وندعو إلى التفاؤل وننسى اللى فات ونسيبنا من الحاضر وننظر للمستقبل وأكيد هنرتاح ومفيش تعب

بيدوم والعسل هنعوم فيه ونغمس القشطة ونلعب فى الزبادى والقلق ملهوش مكان بينا ولا بد للليل

أن ينجلى وللقيد أن ينكسر وللسيل أن ينهمر وإلى آخرة من الأغانى الوطنية الحفازة !

كلام جميل كلام معقول مقدرش أقول حاجة عنه تيرارا !

وسألوا جحا كلاكيت تانى مرة ودنك منين يا جحا قال بصراحة محضرتش محاضرة الودان ومذاكر

لغاية المناخير ممكن تسألنى فى العنين أجاوبك دوغرى !

إمتحانات إمتحانات إمتحانات مفيش مرة شوية فشار والتكرار يفيد المعنى ويوضحة وفى نفس

الوقت يبهمة وتقريبا الإمتحانات مستمرة ضمن النظام الكونى فالشمس تشرق من الشرق

وتغرب من الغرب والإمتحانات بتخترقك من فوق لتحت والعكس صحيح

وأنا ما زلت وسأظل أدخل إمتحانات !

وعشمت نفسى بالمستقبل وقولت أغير الأداء ولازم هتيجى سنة من السنين ومنحفظش المنهج

أو كلمتين نرشهم على الفطيرة قصدى الورقة مع قليل من التطجين الطازج المعتدل صيفا وشتاءا بس

الحمد لله لا أدائى بيتغير ولا المناهج بتتبدل وعلى المتضرر اللجوء للحمام !

واللى ياخد سيكشن فى الكلية دى لازم يرجعلها تانى ما أهو بقى كيف خلاص لدرجة إنى بروح الكلية

كل يوم على المكاره وأعافر وأواجه وطفق يمشى ويركض ويقفز ويمر ويحاور ويسدد ويركل زميلة

وزميلتة لأ طبعا وممنوع قتل الأطفال أولا والشيوخ ثانيا وأخيرا الإيناث زى ما تحب ويكرر المحاولة

ولكن للآسف النهاردة مفيش سكاشن أو محاضرات !

شعور جميل إنك تهيم على وجهك ومفيش أى هدف بالنسبالك سوى تحضر وتسمع ربع قرأن وتمشى

فى أكبر عزاء فى التاريخ وهو عزاء الإنظباط وحفظ العلم فى درجة حرارة الجو !

ويبقى الأمل مستمر ويتوغل وينتشر ويخترق ويروح البيت مهدود حيلة لينام على السرير !

وحبيت أتنفخ وأتنفخت فعلا تقريبا عديت السبعين كيلو منهم تلاتين بالطو وعشرين إنتفاخ والباقى

مواد حافظة وقولت لواحد إنى فى أتخن كلية فيكى يا مصر وهيا هندسة أسوان فرد هذا الإنسان بإنه

طبعا كليتك أشهر من النار على العلم وصائب ما أنتفخت من أجلة وأكد لى صدق معرفتة بكليتى

الجميلة بقولة الرائع والعبارة الشهيرة والدقيقة

" مش هيا دى معهد طاقة " !!

كل مرة على هذا المنوال والشهرة ساعات بتخللى الواحد يتغر والغرور وحش لذلك بدلا من أن أسمع

العبارة الشهيرة تلك وتجبلى تسلخات أو أن أطمع فى سمعة ربما قيدت حركتى كخريج من هذا الصرح

وذلك من طلب للأوتوغرفات وأخذ صورة معى وهكذا من شقاوة المعجبين والمعجبات فآثرت الصمت

والسكوت أو بالفعل أجاوب أنا فى معهد طاقة قسم الكبس الآلى !

وأختلف العلماء فذهب أحدهم برأية إلى الحديقة قصدى إلى أن خمسين شركة هتتخانق عليك لتعيينك

كمهندس بعد ما تتخرج من الكلية دى بالذات بس بمقبول منخفض الكليسترول وآخرين رفضوا

المبالغة فهم فقط 49 شركة ليس أكثر وبمادتين إحداهما مقرر سيتم التعيين من خلالهما بينما

أعرب المتفرجين أنهم 49 شركة فقط بالإضافة لمقاول بخشبه سيتم بناءا على ذلك

الإختيار وذلك دحرا لأى فتن أو إختلاف فى شأن الوظيفة !

وإذا نظرت لحيثيات الإختيار ستجد أن فقط هندسة الشروق تخرج سنويا مش بعد صلاة الجمعة

1700 طالب مدنى "من مجموع 2500 " كامل النقاء وتقريبا وزنة خمسين كيلو قايم

ومن غير إمتحانات مش متحددة مواعيدها ولا فجائية أو متعبة أو حتى إكويزات وبجنية ونص الكيلو

والتقدير بالشوال وأحلى من كده مفيش وبيس يا مان كله فى التمام !!

وقل لى بتاخد صفر فى الأكويز ولا لأ أقل لك من أنت !!!!

وأنا بين نارين نار دور نوفمبر اللى ملهوش مصل ونار دور الجيش اللى ملهوش حل وأيهما يأتيك أولا !!

وكلما تقترب النهاية اليوم بيعدى بسنة وفى خمسة قدام يبقى كدة زادت قوى وشوية إمتحانات كمان

علشان الميزان يطب ونحلل البيعة يبقى المجموع خمسة وعشرين سنة مع سبق الإصرار والترصد !

ومنين نجيب الصبر يا أهل الله ده الدنيا برد والمحلات قافلة والصبر نفسة مش صابر ومتلهف يخلص

عشان الريحة فاحت قوى !!

وكل يوم بيعدى عليا "مش بتاعة تامر" ألاقى نفسى فاضى أقول الإمتحانات حبيبتى راحت فين

وماما ضاعت ومش هيمتحنونا تانى ليه وأنجغة وأفضل متنكد وراكبنى مية عفريت مينزلوش

غير فى الإمتحان يلعبوا فى الأسئلة لغاية ما نص الوقت يعدى وتلاقينى مخلص وطالع

علشان أنتظر الإمتحان اللى بعدة وأركب مجموعة عفاريت غيرهم !

وروحت أستلم فلوس بص الموظف فى البطاقة قالى يا ابنى دى عدى عليها أكتر من سبع سنين

قولتلة يعنى إيه ماتت قالى لأ دى طلعلها شعر أبيض بس وعفنت طايقها إزاى فى جيبك وأنت شكلك

وحش كده فيها لذلك لازم تطلع غيرها هو أنت فقير دى الحوالة بميتين جنية بحالهم والبطاقة مستعجل

خمسة وسبعين يعنى فائض يجيلك شلل رباعى مرتاح على أساس إنى كمان قبضتهم مقدم

فقولتلة مينفعش تعتبرنى متسول وساقط قيد فقالى لأ قولتلة طيب أنا فى أشهر كلية على

مستوى أفريقيا وواخدة الدورى خمسة وتلاتين مرة قالى مينفعش برضو فقولتلة طيب أنا ناوى

أتخرج وبالمرة أعمل بطاقة وأكتب فيها المهنة أمين مخازن إسم الله عليه حامى بيوتنا

إسم الله عليه قالى برضو مينفعش يا إبنى فقولتلة خدلك بريزة وأصرف الحوالة قالى إيه اللى بتقولة

ده يا كابتن دى إسمها رشوة ولولا ما شكلك محترم كنت إديتك فى وشك أنا أقل من عشرين جنية

مبعش ضميرى !!

فبصراحة قولت مش هتشم حاجة يا أبو ضمير مصرى كامل الدسم وروحت أطلع وأنزل

فى البطاقة خمس أيام من أصل تلاتة مستعجل أصلها كانت رفيعة قوى وبتتزفلط من اللى بيطلعها

فخدت يومين زيادة لغاية ما قالوا الريس جاى وأهالى أسوان تقريبا بيحبوه حب عفيف فطلعت

فى نفس الليلة علطول بعد إنتظار 8 ساعات ما إستحملتش الخبر يا عينى أتارى حتى البلاستيك بيؤيد

ويبايع ويخاف !!

وأسيب الحب والنعيم فى أسوان وألاقى المطر والبرك وطلتى البهية فى بلدنا ويقولولى توبى

قصدى قربت الإمتحانات جيت ليه أقولهم لأ دى بعيدة والله مش شايفها وإمتحنا كتير أدينا

خدنا إيه منها ومتقولش إيه إدتنا الكلية بإمتحاناتها وقول إحنا هندى إيه للكلية بسلاطتها !

وقلت مرة بحب الكلية قالوا الواد ده قليل الأدب مش عيب يفضح نفسة والكلية معاه ما يروح يكلم

أبوها أحسن ويمشى شرعى وروحتلة وأمرى لله قالى يا ابنى هحطك على جهاز الكداب هيروح النار قولتله

ميهمكش يا عمى أنا قدها وقدود وأول ما جيت أقعد دوى الصوت فى السماء بأغنية عجيبة بتقول

بتحبنى لا أشك مين دول على الفيس بوك لو مشلتش العيال دى عليك هسك !!!

كفاية حب وكفاية إمتحانات وكفاية أسوان لغاية كده !

كل منا هياخد الشهادة أو هينطقها بإذن الله طال العمر أو قصر زى الأهلى بالظبط هياخد الدورى سواء

أرتفع غيرة أو إنخفض فليه وجع القلب ومصاريف عالفاضى وإسكتشات من أم جنية ونص أعتقونا يرحمكم

ربنا وإن كان على المستقبل أنا متفائل جدا من أول المقال لغاية آخرة خصوصا لما تعرف إنى خريج كليتنا

أقوى من فاندام وأفضل من الشاى أبو نعناع بعد الأكل !

لذلك إبتسم وتفائل وعيش اللحظة وخد شفطة وإدينى شفطة ويلا بقى نزق زقة ونربط الحزام الإمتحانات

على الأبواب وفكر فى بكرة وسيبك من النهاردة وإمبارح ده العمر لحظة بلاش نعديها فى هموم وحسابات

وربنا يعدى الأيام على خير.

أتمنى للجميع حظ أوفر مع إمتحانات سهلة جميلة لطيفة ظريفة

والله الموفق

هااااااااااااااااانت ياعم هانى خلاص مابقى الا القليل
و يارب تعدى الفترة دى على خير
حظ اوفر للجميع

» قول إنطباعك عن إمتحانات نصف العام يا بشمهندس
» حورات الشيطان الرجيم فى اليل البهيم
» حوار من المستقبل
» اثاث المستقبل
» سيارة المستقبل