eng_ghost مراقب عام المنتديات والحوار العام ومنتدى الهندسة المدنية
عدد المساهمات : 4632 تاريخ التسجيل : 16/04/2008 العمر : 37 الموقع : just in my dreams ,, i can reach any place رقم العضوية : 1036 Upload Photos :
موضوع: وايه يعنى جالك عريس ::: كلمة عانس مش بعبع الثلاثاء 2 نوفمبر - 2:01
كلمة عانس مش بعبع
مش معنى انك اتخطبتى انك بقيتى احسن منى
اللى فى دماغى .. اهم بكتير من اللى فى صباعى
عشان تفهمى السطور دى .. ركزى فى الكلام اللى جاى
تخيل الموقف ده، ولد قابل ولد ثاني بالصدفة، الإثنين كانوا مع بعض في المدرسة زمان و ماشافوش بعض من ساعتها، هيسلموا على بعض، و هيبدأ كل واحد منهم سؤال الثاني عن أخبار حياته، و هيقوله الأسئلة التالية بالترتيب الآتي، إيه الأخبار؟ دخلت كلية إيه؟ بتشتغل فين؟ سكنت فين؟ بتشوف مين من العيال بتوع المدرسة؟ و في النهاية، ممكن يسأله عن إن كان إتجوز أو خطب و ممكن جدا ينسى يسأله السؤال الأخراني ده.
تخيل لو نفس الموقف بس أبطاله بنتين مش ولدين، هيبقى الترتيب مختلف تماما، إزيك؟ واحشاااانييييييي، و بعدها على طول، هتشاور علي الصابع اللي بيتحط فيه الخاتم و هتقولها... إيه... مافيش حاجة؟ إتخطبتي يعني؟ إتجوزتي؟ خلفتي؟ إتطلقتي؟ إترملتي؟ و بعدها ممكن تفتكر في نهاية الموقف تسألها إن كانت بتشتغل، إتخرجت، بس ممكن جدا ماتفتكرش و متسألهاش هذا النوع المهمل من الأسئلة.
و ده مش عشان البنات تافهين، و لا أغبية، و لا عشان مش بيقدروا العمل، بس عشان تاريخ كامل من التربية و الضغط اللعين.
البنت بتتربى في البيت مع أخوها الولد، بيقفشوا على الولد لو ماذاكرش، في الوقت اللي بيقفشوا عليها لو قعدت قعدة مش ولا بد، يقفشوا على الولد لو ماجبش مجموع، و يقفشوا عليها لو مالمتش شعرها، لو جاله تليفون من بنت هيقولوله تعالى كلم، بس لو جالها تليفون من ولد هيقفوا بصينلها كمفتش في المطار باصص لواحد جاي من الإمارات و معاه عشر شنط٠
يوم التنسيق، الولد مايصحش يخش فنون جميلة عشان "بتاعت بنات" و البنت ماتخشش هندسة عشان "بتاعت ولاد"٠
و لو الأم بتكلم صديقتها هتقولها، آه... حمادة دخلت طب، و ميار إتخطبت الحمد لله... لدكتور برضه طبعا٠
لو الولد إتخرج و ماشتغلش يبقى فاشل حتى لو إتجوز رابعة العدوية، في حين إن لو البنت إتخرجت و عملت ماجستير و دكتوراه و خدت نوبل و ماتجوزتش تبقى فاشلة.
و ده اللي بيخليها تحت ضغط عصبي و نفسي دائم، و بيبقى أهم حاجة بالنسبة ليها عشان تثبت إنها إنسانة ناجحة لأهلها، و لصحباتها اللي على طول بيسألوها عن الخاتم، إنها تتجوز و توقع العريس.
لإن المجتمع مش مستني منها غير كده، و كده بيخليها المجتمع تحس إن ده أهم حاجة هي عايشه عشانها، و أي حاجة ثانية رفاهية.
و طبعا أنا رأيي إن البني آدم، ولد أو بنت، مش بيتقاس نجاحه بالشغل بس، أو الجواز و علاقاته بس، الحقيقة إن البني آدم عنده خمس حاجات محتاج ينجح فيهم كلهم، و لو فشل في واحدة منهم عمره ما هيبقى راضي بالكامل، مهما نجح في الباقي.
الخمس حاجات هما العمل، الروحانيات، العلاقات البشرية، الصحة، التضامن مع المجتمع.
يعني لو إنت ناجح في شغلك قوي بس مش متجوز أو وحيد من غير أهل و صحاب مش هتبقى مبسوط، لو متدين جدا بس صحتك زفت نفس الكلام، لو عندك كله بس عايش لنفسك مش بتنفع اللي حوليك برضه ضميرك هينغص عليك و مش هتستمتع بنجاحك ده.
بس اللي بيحصل للأسف إن الواحد منا بيلاقي نفسه ناجح في واحدة في دول عن الثانيين، فيركز فيها قوي، و يستثمر فيها وقته و مجهوده لإنه شايف العائد بتاعها، فيلاقي نفسه أهمل الباقي، و طبعا عشان العدل الإلهى ممكن يتأخر بس مسيره يتطبق، اللي هيهمله الواحد منا، هيرجعله قدام ياخد حقه.
أهملت في صحتك هتيجي قدام تعيى جامد و صحتك تقولك هاتلي حقي القديم، هتهمل في العلاقات مع مراتك و عيالك عشان شغلك، هييجوا قدام يكرهوك، و تلاقي عيالك أدمنوا لا قدر الله أو باظوا بأي شكل، و هكذا.
فلازم الخمسة يكونوا قريبين من بعض في إهتمامك بيهم، أكيد مش هيكونوا بالظبط زي بعض لإننا بشر و بنغلط و بنسرح مع إهتمامتنا بس المفروض نظبطهم زي الإكواليزر كده.
أنا بقى صعبان عليا قوي البنات، عشان هما بسبب اللي بيشفوه بيركزوا بس على الجواز، اللي هو بند فرعي تحت بند العلاقات البشرية.
و المصيبة إنه حاجة مش بإديهم كمان، لإنهم في المجتمع ده تحت بند العرض، مش الطلب، يعني هما مايقدروش يطلبوا ولد للجواز، أو لدخوله العلاقة معهم.
يعني حتى لو فشلوا أو نجحوا مش هيبقى الموضوع في إيدهم، لإن مافيش طريقة واحدة معروفة تخليهم يصطادون العرسان، يعني ممكن تبقى حلوة و ذكية و مش نكدية، و ماتتجوزتش، نصيب أو إرادة إلهية أو صدفة، المهم إنه مش ذنبها.
ليه نفضل نبصلها نظرة الحسرة، محسسنها إنها فاشلة؟ و هي عندها أربع حاجات ثانية لازم تنجح فيهم، ده غير إن العلاقات البشرية مش كلها جواز بس.
لازم نحسس البنت إننا مبسوطين منها لو بقت ناجحة في شغلها، إنها ممكن يبقى ليها حلم، ممكن تغير المجتمع و العالم كمان، و إن كلمة عانس مش بعبع، و لازم تبطل تخاف منها عشان تعرف تعيش و تشتغل و تبدع و تضيف للمجتمع و ليها، و الجواز نصيب بتاع ربنا.
و خصوصا بقى إن معظم الولاد بيحبوا البنت اللي عندها حلم و مجتهدة و عندها شخصية مستقلة أكثر، و يا سلام لو ناجحة قوي، و معاه محسساه إنه برضه راجلها و محترماه و عايزة تكوم نفسها تحت جناحه.
ياخد رأيها لإنه مهم، و يستفيد بعقلها عشان مليان، يتباهى بنجاحها و يحس إنه أضاف ليه.
و ساعتها حتى لو قررت إنها تسيب ده كله و تبقى أم و زوجة فقط، يبقى عمل نبيل تشكر عليه، جه من موقف قوة، و إختيار واعي، مش جه عشان إجبار لإنها مش هتنفع إلا فيه.
لإن اللي جوا دماغها أهم بكثير من اللي ملفوف حوالين صباعها.
تحياتى للجميع
*************
ziziii_ziziii مهندس جديد
عدد المساهمات : 9 تاريخ التسجيل : 30/11/2010 العمر : 35 Upload Photos :
موضوع: رد: وايه يعنى جالك عريس ::: كلمة عانس مش بعبع الخميس 2 ديسمبر - 22:53
موضوع لطيف بجد لكن تقول لمين دى ثقافة مجتمع بمعنى ان لازم يكون فى فكر جديد وطبعا ورا كل فكر ناجح ناس مؤمنه بيه وبتحارب علشانه ومتبوصش وراها
موضوع: وايه يعنى جالك عريس ::: كلمة عانس مش بعبع 
الثلاثاء 2 نوفمبر - 2:01
