معا ضد غلق قسم عمارة

على ماعتقد اننا شغالين كلام في كلام ومفيش فعل حتى الان بس ان شاء الله زمن الكلام انتهى ولازم نبدا نبقي احنا الفعل ونبطل نكون رد الفعل عشان كده هيكون فعلا اننا نتحرك مع بعض عشان نقول احنا كمان ممكن نفعل وده من خلال لاننا نبعت خطابات شكاوي لاصحاب القرار واصحاب الكلمة من الصحافة والجرائد المحلية المؤيده منها والمعارضة واحنا بنقترح الصيغة الخطاب كالاتي:

السيد الدكتور /وزير التعليم العالي
تحية طيب وبعد

نحن طلاب كليه الهندسه جامعة جنوب الوادي فرع اسوان
نرجو من سيادتكم التكرم بالنظر اللي المشكلة التى واجهناها مع بداية دخولنا لقسم الهندسة المعمارية وهو غلق القسم مع بداية الدراسة لعام 2008\2009 مع العلم ان الكلية لم تعلمنا مسبقا بموضوع غلق القسم وبناءا على ذلك قمنا بكتابة قسم عمارة في الرغبات وعند بداية الدراسة فوجئنا بغلق القسم فجأءة وبدون سابق اخطار من ادارة الكلية لنا في الوقت المناسب حتى يتسنى لنا التحويل الي قسم عمارة كلية هندسة اخري بالجمهورية
نرجو ان يتسع صدر سيادتكم لابنائك الطلبه
ومساعدتنا فيما فعلته اداره الكلية باغلاق قسم عماره
مع بدايه العام الدراسى
دون اي سابق انذار او تحذير او تنبيه من العام الماضى
مما قد اثر علينا بالسلب وجعلنا في حيرة من الامر
خاصه بعد غلق باب التحويل فى جميع كليات هندسه مصر
فرجاء من سيادتكم التكرم
والتحرك السريع لمعرفه مصيرنا
الذي لا نعرفه حتى الان وانقاذنا
من دخول اقسام غير مرغوب بها وقد ارغمنا عليها
فنحن وحتى الان نجهل فى اي قسم نحن
وشاكرين سعة صدركم
والسلام عليكم ورحمه الله

لازم طلبة اولى عمارة السنة دي هى اولا ناس اللي تتحرك وده من حقهم ومحدش يتنازل عنه وماضاع حق وراءه مطالب

الكلام ده هيتحط فى البوابه ويتبعت بيه على الإيميلات ويا ريت
الكل يمرر الرساله ويا ريت تتبعت فاكس لوزير التعليم العالى
ولجميع الجهات المختصه وإن شاء الله تجيب فايده.
والله الموفق

ودي كل الارقام والفاكسات والايميلات
اللى هتساعدنا

وزير التعليم العالى
د\ هانى محفوظ هلال

hhelal@mailer.eun.eg
hhelal@link.net

فاكس
27941005

الساده الصحفيين

ا\محمود سعد
saad.mashakel@gmail.com

ا\عمرو أديب

alkaheraalyoum@orbit.net

أ \ مرسي عطالله
attalla@ahram.org.eg

ا\مصطفى بكرى
mostafabak@hotmail.com

ا\أحمد رجب
a_ragab@akhbarelyom.org

الجرائد اليوميه

جريدة أخبار اليوم
akhbarelyom@akhbarelyom.org

جريدة الأهرام
ahram@ahram.org.eg

جريده المصري اليوم
editorial@almasry-alyoum.com
admin@almasry-alyoum.com

جريده المساء
ask@almessa.net.org

جريده الوفد
contact@alwafd.org

info@alwafd.org

webmaster@alwafd.org

جريدة الجمهورية
eltahrir@eltahrir.net

جريدة البديل
elbadeel@elbadeel.net

البرامج اليوميه

برنامج العاشرة مساء_قناة دريم
al3ashera@dreams.tv

برنامج 90 دقيقة
90min@elmehwar.tv

برافو جودز

ولعت

ربنا يوفقكم يارب و يرشدكم لما فيه الخير ....

ولو اقدر اساعد بأي حاجه انا في الخدمة .

تقبلوا تحياتي

دي صيغة كمان مقترحة نبعتها للوزارة ، وإن شاء الله أكتب صيغة تانية للجرايد .

بسم الله الرحمن الرحيم

السيد الدكتور / وزير التعليم العالي - الموقر -

السلام عليكم ورحمة الله وبركاته وبعد :

الموضوع : تظلم ، للغلق المفاجئ لقسم الهندسة المعمارية
في كلية هندسة أسوان مع بداية
العام الدراسي دون سابق تحذير

نحن - طلبة كلية هندسة جامعة جنوب الوادي فرع أسوان قسم الهندسة المعمارية - نرجو من سيادتكم التكرم بالنظر في الكارثة التي حلت بنا مع بداية العام الدراسي حيث تم إغلاق قسم ( الهندسة المعمارية ) بقرار إداري مفاجئ وصادم من عمادة الكلية .

وبناء على ما سبق فقد لحقت بنا الأضرار التالية :

1- تجميدنا عن دخول قسم الهندسة المعمارية .
2- إجبارنا على دخول أقسام أخرى لارغبة لنا فيها بعد استحقاقنا للاتحاق بقسم العمارة حسب استبيان الرغبات الذي تم مع نهاية العام الماضي .
3- تعطيلنا عن اتخاذ إجراء التحويل إلى الأقسام المعمارية في كليات الجمهورية الأخرى بفعل فجائية القرار وتزامنه مع فترة غلق باب التحويل .

ولقد رفعنا إلى سيادتكم تظلمنا هذا راجين أن يتسع صدركم له ، آملين بسرعة التحرك في إنقاذنا وإعادة فتح القسم من جديد لتجنب أزمة مريرة يمر بها عشرات من طلبة قسم الهندسة المعمارية بكلية الهندسة في أسوان حالياً .

وتفضلوا بقبول وافر الاحترام والتقدير .

طلبة قسم الهندسة المعمارية بكلية الهندسة / أسوان .

ممتاز ياشباب وربنا معاكم ياطلبة اولى عمارة
ونرجو من السيد وزير التعليم العالى النظر فى تلك المشكلة بعين الرحمة
واعادة النظر فى ادارة كل من جامعتنا وكليتنا

ياريت تبعتوا أي من الصيغتين في فاكس وفي ايميل لوزير التعليم العالي
والأهم الفاكس .. لأن ده انا ضمناه وفعلا الوزراء بيشوفوه
وما تستنوش لغاية ما تيجوا أسوان .. لأن أصلا مرحلة النقاش مع الادارة خلصت من زمااااااان

ودة رقم رئيس الجامعة ممكن ..
0101224568

وانا معاكم ان شاء الله

عايزين الناس كلها تبعت ع الأقل بالإيميل

ربنا معانا ان شاء الله يا بشمهندسين

ويا ريت كل الناس تشارك

كلامكم كله جميل بس انتوا بتفكروا بقلوبكم وبحماس مش تفكير عقلاني

اسألوا نفسكم سؤال واحد . هوه القسم اتقفل ليه اصلا ؟ ولو كان ممكن تتحل مشكلته طيب ما اتحلتش ليه من الاول ووصل الامر لقرار غلقه ؟

ياسادة يامهندسين لما القسم هيتفتح مين اللي هيمسكه ؟ مين اللي هيحاضر فيه ؟ دكاتره ومعيدين كهربا ولا دكاترة ومعيدين مدني ؟ ولا ايه رأيكم نعمل انتخابات بين الطلبة علي مين اللي يحاضر في القسم؟
ياجماعة لازم تعرفوا ان فيه دكاتره كتير بره كليتنا تخصص عمارة بس يا اما همه مش عايزين يجوا كليتنا يا إما الكلية مش قادرة تدفع مرتباتهم

ماعلينا المهم ان اكيد الحلول مش سهلة وحاليا قرار غلق القسم هوه القرار السليم مؤقتا وليس ابدا , وبعدين انا عند رأيي بخصوص قسم اتصالات بضرورة غلقه هوه الاخر رغم اني خريج هذا القسم ولكن الحق يجب ان يمضي علي اعناق الجميع

والسلام عليكم

مع احترامى لرأيك يابشمهندس MASA
انا معترض معاك فيها
اكيد انت لما دخلت قسم كهرباء عشان كان نفسك فيها
واكيد لما تدخلت اتصالات اكيد برضو كانت رغبه منك
يبقى بنفس الحق اللى انت اخدته لازم الباقيين يخدوا نفس الحق
فى القسم اللى هم عاوزينه واللى هم يفضلوا يقعدوا فيه
ده من وجهه نظري
وبرضو اداره الكليه هى اللى قررت فتح القسم ده من البدايه خالص
وهم عارفين كويس جدا انهم هينتدبوا دكاتره
بعد السنييييين دى كلها يقرروا يقفلوها بسهوله كده
يبقى ده مش مش مشكله طلبه عماره او حتى اتصالات يابشمهندس

اقتباس :: مع احترامى لرأيك يابشمهندس MASA
انا معترض معاك فيها
اكيد انت لما دخلت قسم كهرباء عشان كان نفسك فيها
واكيد لما تدخلت اتصالات اكيد برضو كانت رغبه منك
يبقى بنفس الحق اللى انت اخدته لازم الباقيين يخدوا نفس الحق
فى القسم اللى هم عاوزينه واللى هم يفضلوا يقعدوا فيه
ده من وجهه نظري
وبرضو اداره الكليه هى اللى قررت فتح القسم ده من البدايه خالص
وهم عارفين كويس جدا انهم هينتدبوا دكاتره
بعد السنييييين دى كلها يقرروا يقفلوها بسهوله كده
يبقى ده مش مش مشكله طلبه عماره او حتى اتصالات يابشمهندس

سيدي الفاضل مع احترامي ايضا لرأيك فاقول لك ان اي كليه حديثة الانشاء لابد لها من الاستعانة بمدرسين من الكليات الاخري وبالطبع لابد انك تعلم ان تعيين معيدين بسرعة ليس بالامر الصعب وعندها تكون نظرية ادارة الكلية هو الاستعانة بدكاتره من خارج الكلية لحين اعداد الكلية لدكاتره من خريجيها وهذا بالطبع يتطلب وقتا طويلا يصل الي 7 لو اكثر من السنين

وما اريد ان اقوله لك عن تجربه هو ان فتح قسم لمجرد تطييب خاطر بعض الطلبة من المولهين و المولعين بالقسم شئ اكثر من خاطئ.
ومالا تعلمه انت ولا غيرك ان مهندسي قسم اتصالات في كليتنا غير اكفاء علي الاطلاق واعدادهم لسوق العمل ضعيف ولا يرقي لمستوي خريجي اسوأ الجامعات , والسبب هو التصميم والعند علي استمرار فتح قسن اتصالات امام الطلبة دون وجود دكاترة من داخل الكلية للتدريس فيه ودكاترة اسيوط معظمهم اصبح يرفض المجئ الي كليتنا مما يضطر الكلية الي الاستعانة بدكاترة لا علاقة لهم بالاتصالات , والا فقل لي بالله عليك ماعلاقة دكاترة واساتذة معهد طاقة بقسم اتصالات وعلومها ؟

ملحوظة: من يستطيع الاجابة علي السؤال الاخير فاني اكون شاكرا له وداعيا له ان يديم الله عليه نعمة العقل التي فقدتها بسبب التفكير في السؤال الاخير

اقتباس :: فقل لي بالله عليك ماعلاقة دكاترة واساتذة معهد طاقة بقسم اتصالات وعلومها ؟

انا واجهتنى نفس الحيره بس للاسف انا مدنى ومش عارف طبيعه مواد
قسم اتصالات وهل هي فعلا بيدرسوها فى معهد طاقه

الله اعلم

وطبعا انت اكيد اكثر درايه بسبب معرفتك بسوق العمل ومعرفتك لمستوي اقرانك من المهندسين
على العموم شكرا كتير على ردك وكلامك المقنع

هو فعلا كلامك صح يبشمهندس ماسا بالنسبة لتوفير اعضاء هيئة التدريس احنا مش ضد غلق القسم لان القسم مش هيتقفل هو حيتجمد فقط المزعج في قرار التجميد هو غلقه دون سابق انذار بفترة كافية للطلبه ياعنى مثلا قسم اتصالات كانوا نزلوا اعلان عليه السنه دي للطلبة اللي داخله اولى كهربه ان اللى يدخل كهربة يعمل حسابه ان مفيش اتصالات عشان لو عاوز يحول من الكلية ويروح قسم اتصالات في كلية تاني يعمل كده انما يقفل القسم على طلبة تالته السنة دي وكمان اول الدراسة وغير كده ان نظام دخول القسم مختلف في معظم كليات هندسة الجمهورية لانها بتبدا اتصالات من سنة اولي مش من تالته زي عندنا وبالنسبة لطلبة عمارة كانوا بردوا قالوا للطلبة مع نهاية السنة اللي فاتت عشان الناس تعمل حسابها ان مفيش عمارة في اسوان بعد اعدادي مش ياجوا بعد مالتحويل بين الكليات يقفل والسنة تبدأ ياجي يقول خلاص قفلنا القسم واللي مش عجبوه يشرب من البحر انا في راي حاجة من الاتنين يافتح القسم السنة دي لطلبة عمارة ياما يتم تحويل طلبة اولى عمارة فورررررا لعمارة اسيوط ويكون مش تحويل من اعدادي لقسم عمارة ياعنى بتنسيق لا يكون تحويل من عمارة لعمارة والله ولي التوفيق

اتفق واتفق معك اخي الكبير

الدكتور شوكت القاضى كتب فى رساله وصلتنى على الإميل

السلام عليكم

كل عام وانتم بخير

انتم زعلانين علشان اغلاق قسم العمارة ليه

ياجماعة مافيش اعضاء هيئة تدريس بالقسم اطلاقا وكل المنتدبين من جامعة اسيوط اما سافروا إلى اعارات لدول عربية او احجموا عن السفر بسبب المسافة التى تقطع من اسيوط لأسوان وعذاب ركوب القطارات بالإضافة ان العائد المادى غير مجدى

انتم زعلانين علشان القسم يغلق وبالتالى الطلاب المفروض يدخلوا القسم بشوفوا قسم اخر ويتعلموا ولا ندخلهم القسم ومايتعلموش حاجة وبالتى يطلعوا معماريين زى قلتهم

ياجماعة هذا القرار هو القرار الصائب لحين عودة المبعوثين من المدرسن المساعدين للحصول على الدكتوراه واكتمال الحد الأدنى لاعضاء هيئة التدريس لكى تتم العملية التعليمية بشكل جيد

د شوكت القاضى

استاذ مساعد بقسم العمارة جامعة اسيوط ومنتدب بعمارة اسوان

فعلا الدكتور شوكت جاب من الاخر وقال كل المفيد

السلام عليكم ورحمه الله وبركاته
اود ان اشكرك باشمهندس ماسا علي رايك ويمكن الي حضرتك قولته صح عن ان قسم اتصالات غير جاهزعلشان يطلع باشمهندسين يكونوا علي جداره في سوق العمل
بس اللي حضرتك مش حاسه بان لما يكون انسان معلق اماله علي قسم معين مش بيبص علي انه هيطلع باشمهندس فاهم في كل حاجه بس علي الاقل هو بيبص علي الدراسه اللي بيحبها واللي شايف نفسه فيه يعني انا مثلا لما قالوا قسم اتصالات هيتقفل انا متخيلتش نفسي في حاسبات ولا بور مع احترامي لكل اللي في القسمين بس مش هينفعوا معايا انا
وموضوع ايه علاقه دكاتره معهد طاقه بدراسه اتصالات اكيد في علاقه وهما علي فكره بياخدوا نفس المواد اللي عندنا او مواد مشابهه علي الاقل وممكن نقول ياباشمهندس نص عماء ولا العماء كله
يعني نفهم 50%ولا ندخل قسم تاني ونعيد السنه لا قدر الله
يعني اعتقد علشان كدا احنا عايزين القسم يبقي مفتوح علشان ندخل الحاجه اللي بنحب دراستها
مش اللي فيها دكاتره ومش هنفهم منهم بسبب رفضنا للقسم ولا حضرتك ياباشمهندس رايك ايه
يعني لو حضرتك كنت ناوي علي اتصالات وقالوا هيتقفل هتدخل قسم تاني علي طول ولا هتعمل ايه؟؟؟؟؟؟؟؟

رساله من طالب في اولى عمارة
السلام عليكم اولا ... على اكل اعضاء المنتدى وعلى كل اهل اسوان وهندسه اسوان
وكل سنه وانتم طيبين بمناسبه شهر رمضان والعيد ... مش هطول في الكلام
طبعا بعد احترامي وتقديري لكل كلمه اتقالت في الموضوع ده
.. اللي موافق واللي معارض
.. ممكن بس لو تسمحولي الفت انتباه حضراتكم لحاجه
.. في السنادي ولاول مره تحصل في القسم جماعه كبيره عادو السنه .. في ناس قالو ظلم وليه ومش ليه .. مش هيا ده القضيه كل واحد بياخد نصيبه ومجهوده .. مع ان النسبه اللي نزلت السنادي نزلت على مواد اعزروني اني اقول عليها شبه تافهه ماتستاهلش سنه كامله ... غير كده اغلب اللي عادو السنه عادوها على التيرم التاني بس مفيش مواد تيرم اول .. انا يعتبر بشتكي ليه سقطو بس ده مش من حقي .. الحمدلله على كل حال
... بس سمعت ان الجماعه دول اللي محدش فاكرهم خالص وسط الكلام ده كله لما هيتقفل القسم هينجحوهم اوو هيحولوهم قسم تاني ..ينجحونا ؟؟ اولا مستحيل وكله معايا في الكلمه ده ... وحتى لو نجحونا بصراحه والحق ينقال مش من حقنا ابدا مهما حسينا اننا انظلمنا بس خلاص نزلنا السنه يجو ينجحونا ازاي واكيد فيه ظلم لناس تانيه ومنارضهاش لغيرنا
..حكاية التحويل بقى من قسم لقسم ...مع انهم في بالهم وهقولها بصراحه وانا منهم في بالنا اننا مانستاهلش السقوط ده ... يجي زياده على كده انهم يحولونا من قسم لقسم تاني ... مع اننا جايين من جامعات تانيه من بلادنا ومتغربين عشان يجو في الاخر يحولونا من قسمنا ...فين الحق؟؟؟؟؟
... والغربه اللي اشتريناها ده في سبيل الاقسام اللي حلمنا بيها واهالينا كانت امنياتهم فيها ... ده كله يتهد عشان مجرد كليه مش عايزه توفر مصاريف سفر ودراسه؟؟؟ مع ان القسم لا محتاج لمعامل .. ولا محتاج لاي حاجه فيها تكلفه .. كله بيبقى على الطالب من اول يوم لاخر يوم ... كل اللي عندنا معمل كمبيوتر واحنا بنجيب لاب توبات معانا ... ليه مايقسموش الفلوس اللي بتوصل للكليه على جميع الاقسام بالتساوي
... المعامل التخيليه ومعمل قسم كهربا ده كلها ... يعني كليه فيها اكبر معمل تخيلي في الشرق الاوسط وسمعت انه الوحيد اصلا ... وفي نفس الوقت قفلو فيها قسم عشان عدم توفر الامكانيات؟؟؟ اي عقل بشري يقتنع باللي بيتقال ده ؟؟؟
... فرجاء خاص من كل مسؤول .. ومن كل ليه اي سلطه في الكليه .. او راي او كلمه ... الموضوع ده فيه ظلم لناس كتيره ... سواء اللي في الدفعه او اللي هيدخلو قسم عماره من اعدادي ... اكيد في ناس شدت حيلها عشان كان كل حلمها القسم ده من قبل ماتخش الكليه ... والله صعب جدا الشعور لما تلاقي الحلم بينهار قدامك في يوم وليلة
... كل اللي يقدر يمنع الموضوع ده ياريت يعمل كل اللي بايده ... مع احترامي لكل كلمه وكل راي اتقال في الموضوع ده ..ز وربنا يجيب اللي في الصواب

اقتباس :

فقل لي بالله عليك ماعلاقة دكاترة واساتذة معهد طاقة بقسم اتصالات وعلومها ؟

معايا رد من رسمي في معهد طاقة

rasmy007 كتب:

وفي طافة بيدرسوا مواد اتصالات الدكاترة دى أكيد انا اعرف انهم
بياخدوا communication
ثم ان الدكتور بدير _ بيقولوا ان هندسة قنا خدته

يعنى هو بقى في هندسة قنا مقيم خلاااااااص

وحييجي لنا كمنتدب _

احلى نكتة سمعتهاااااااااااااااااااااااا

شكراً هندسة قنا _ موفرة لنا الدكاترة

ربنا يخليكىى

في حاجة كمان عايز اقولها

لما الدكاترة اعترضوا كلهم ع قرار غلق قسم اتصالات _
والدكتور محمد محمود قدم استقالته

الغريبة ان الكلية عرفت تجيب دكاترة من تحت طقاطيق الأرض
اشمعنى يعنى عمارة مش حيعرفوا يجيبوا لها دكاترة
___

واللى بيقولوا ان المعيدين في عمارة سافروا يحضروا دكتوراه ومارجعووش

انا اعرف ان نصهم يحضر على حسابه الدكتوراه

وعايزينهم يرجعواا ؟؟؟؟؟؟؟؟؟؟

ياخى اللى اختشوا ماتوا

ياجماعه ماتتعبوش اللى له حق مش لازم يضيع وانا ع فكره واحد من الناس بتوع اتصالات اللى عملوا المستحيل عشان القسم يتفتح وسافرت لغايه اسوان عشان اتابع الموضوع من هناك وكنت هموت ف السكه عشان القطر ولع بالركاب ف السكه وكل ده وانا كان ممكن اعمل اكتر من كده عشان انا بجرى ورا هدف والحمد الله القسم اتفتح وعشان كده انتم مش لازم تسكتوا والموضوع مش موضوع طلبه عماره بس الموضوع موضوع كل طالب ف الكليه دى وكل عامل فيها فياريت محدش يكبر دماغه وانا حاسس انه انشاء الله ربنا هيكرمنا وهتجيب نتيجه

ياجماعه لازم يكون النشاط اكبر من كده يعنى ف ناس كتير مش عارفه الموضوع وانا بتصل بيها اقولها الكلام ده فياريت كل واحد مننا يحاول يبعث ع قد مايقدر من تظلمات وفاكسات ومحدش يقول انا ماليش دعوه ده موضوع يخص عماره وبس لا الموضوع ده بتاعنا كلنا وانا ع فكره مش ف قسم عماره وبحاول ابعث ع قد مااقدر رغم انه انا اعرف ناس عماره بتنفض ومش هاممها اى حاجه لانهم ف سنه تالته ورابعه ياريت تفهموا كلامى كويس لانه الموضوع اكبر من مجرد اغلاق قسم وبس ده عبث ادارى واخلاقى من الكليه والجامعه واللى عايز ااكدهولكم انه الاستاذ رئيس الجامعه مشترك ف الموضوع ده وهو كمان عايز يوفر وممكن بكره يقفلوا قسم تانى وممكن يقفلوا الكليه يعنى نيجى ع السنه الجايه يقولولك ده مفيش اعدادى هندسه وربنا يسترها

» تجميد قسم عمارة (مفيش اولى عمارة السنة دى )
» امتحانات قسم عمارة
» استفسار يخص أولى عمارة .
» عمارة حاتم الشلمة
» عمارة محلية من ليبيا